Feira Franca
Ven ao medievo coa Feira Franca
Pontevedra celebra a súa festa de interese turístico de Galicia
A segunda fin de semana de setembro a cidade de Pontevedra fai unha viaxe no tempo ata a época medieval coa celebración da Feira Franca, declarada de interese turístico de Galicia en 2013 e unha das festas de época máis importantes das Rías Baixas. Esta celebración conmemora un feito que sucedeu en 1467, cando o rei Enrique iv concedeulles ás e aos cidadáns o privilexio de celebrar durante un mes un mercado libre de impostos.
A localidade de Pontevedra enfráscase de cheo no medievo durante dous días de festexos nos que mestras e mestres artesáns, ferreiras e ferreiros, carpinteiras e carpinteiros, redeiras e redeiros, palilleiras e palilleiros ou músicos pasean polas engalanadas rúas e prazas máis emblemáticas da localidade do río Lérez. Esta celebración, para a que as e os cidadáns e visitantes preparan as súas vestimentas e organizan banquetes medievais, presenta unha programación con todo tipo de actividades.
As rúas da cidade ofrecen diversas representacións, como a do transporte do viño, recreacións de oficios, exhibicións de disciplinas de caza, deportes ou danzas; todo un abano de posibilidades que inclúe tamén actividades infantís con xogos medievais, lendas ou as atraccións máis tradicionais.
Torneo medieval, recreación do transporte de viño e moito máis
A Feira Franca presenta múltiples actividades lúdicas cheas de historia, que van desde a representación do transporte do viño ou o torneo medieval, ata espectáculos en Montero Ríos de cetrería, tiro con arco, exhibicións de música medieval, tamén con pasacalles, e danza ou esgrima. Esta última, con exhibicións noutras prazas como a Ferrería ou a Verdura. Miles de persoas, acoden a esta celebración vestidas de época e forman parte deste espectáculo medieval, tornándose en protagonistas polas rúas e prazas decoradas con bandeirolas, escudos e outros motivos.
O transporte do viño é un dos pratos fortes, unha recreación que percorre as rúas de Santa Clara, Sarmiento, Pasantería e, finalmente, as prazas da Ferrería e da Peregrina. Outra das citas máis destacadas é o torneo medieval, que reúne público infantil e adulto; un espectáculo feito a medida para poder gozar en familia e con amizades.
Actividades infantís e comercio local do medievo
A diversión para as e os pequenos da casa está asegurada, xa que se celebran todo tipo de actividades infantís en distintos recunchos da localidade. As lendas medievais enchen de maxia as rúas do centro e na praza de España hai atraccións medievais durante todo o día e un campamento medieval.
O comercio invade as rúas da cidade cos mercados de alimentación, na Alameda, nos soportais da praza da Ferrería, en Pasantería e na praza de Curros Enríquez, e o mercado de artesanía na avenida de Santa María. A demostración de oficios e talleres do medievo desenvólvese na praza da Ferrería e na do Peirao, onde as e os viandantes aprenden distintas profesións como a das persoas tecedoras de liño, as palilleiras, as redeiras, as carpinteiras, ferreiras, canteiras ou curtidoras de peles, entre outras disciplinas.
