Festa da Ameixa do Carril

Festín das mellores ameixas no Carril

Goza deste saboroso molusco á mariñeira ou noutras especialidades

Agosto empeza ao grande, e iso sábeno moi ben en Vilagarcía de Arousa. O día 1 comezan na localidade os festexos en honra a san Roque, que continúan durante as seguintes semanas con actividades, música e diversos eventos.

A Festa da Ameixa de Carril, aínda que non está ligada directamente ás Festas de San Roque, coincide en tempo e lugar con elas. A rubia, a babosa e a xaponesa son os tipos de ameixas que máis se cultivan en España. A rubia, de orixe portuguesa, é a que máis éxito ten en Galicia e o seu prato, á mariñeira, o máis popular.

Con 500 anos de historia oficial, O Carril presume de varias xeracións dedicadas ao mar: ao peixe, marisco ou calquera outro froito que puidesen cultivar ou extraer das augas costeiras; é unha arte que se conmemora coa Festa da Ameixa desde hai máis de dúas décadas, tras máis de catro séculos de experiencia. Talvez por isto, ou polo seu bo humor, posúen a súa propia orde, a Orde da Ameixa.

As persoas amantes da enoloxía sempre poden acompañar as ameixas cun bo viño do Val do Salnés con denominación de orixe Rías Baixas. Todo é pouco para dar culto a este molusco, do que, como curiosidade, podemos destacar que se trata do animal máis lonxevo do mundo documentado ata a data, cos envexables 507 anos cos que se datou un destes bivalvos recentemente en Islandia. Casualmente, a parroquia pontevedresa do Carril ten a mesma idade.

Para ver e percorrer

Existen moitas opcións para ver e percorrer entre prato e prato na comarca do Salnés, pero se preferimos quedarnos no municipio podemos visitar a illa de Cortegada, achegarnos ao castro de Alobre ou admirar o petróglifo dos Ballotes.