Festa do Choco
Un festín para o padal
En Redondela péscase choco desde fai máis de tres séculos. Este cefalópodo é un prato que identifica a este municipio das Rías Baixas en toda a provincia de Pontevedra, ata o punto de que as redondelás e os redondeláns teñen choqueira e choqueiro como un xentilicio non oficial pero moi arraigado no saber popular.
Cada primeira quincena do mes de maio, a localidade vístese de longo para homenaxear como se merece o rei dos seus mares e tamén dos seus fogóns. No pobo, unha carpa convértese no epicentro da degustación popular mentres os establecementos hostaleiros afánanse en sorprender coas súas receitas.
A afluencia de visitantes en cada edición se multiplica e xa se conta por miles. Se o choco é, por suposto, protagonista destas elaboracións, os ingredientes que o acompañan varían tanto como a imaxinación de cada cociñeira ou cociñeiro. Con arroz, guisado, na súa tinta, con patacas, con ameixas, en empanada, en fabada ou con grelos son só algúns dos pratos que tentan a calquera comensal. Ademais de propoñer un festín para o padal, a festa convértese nunha proba de orixinalidade entre establecementos hostaleiros, que compiten por conseguir distincións para as súas propostas creativas ou tradicionais.
Moito máis que unha celebración, este evento é unha manifestación da importancia do choco na idiosincrasia redondelá. Os chocos críanse en augas do municipio e captúranse de modo artesanal na enseada de San Simón —que é onde máis abundan— usando nasas, cunha técnica tradicional que foi pasando de xeración en xeración.
Ademais da oferta gastronómica, hai moitos motivos para visitar este pobo: a música soa, as rúas énchense de propostas e o ambiente lúdico imprégnao todo desde a mañá ata a noite, cando a verbena engade ritmo e diversión.
E ademais de gozar do sabor máis redondelán, esta localidade das Rías Baixas permite coñecer outros tesouros destas terras: a illa de San Simón, o Camiño de Santiago e paisaxes, praias e rutas sempre fascinantes. En materia culinaria, aínda que o choco é o prato estrela, ao longo do ano exáltanse ademais outros produtos como o mexillón ou a mazá.
Finalmente, de entre todas as festividades destacan as do Corpus Christi, ligadas á Festa da Coca, nas que se exhiben unhas alfombras florais que son auténticas obras de arte e báilanse danzas propias desta zona.
