Festas de San Martiño en Moaña

Unha cunca de viño nos «furanchos» de Moaña 

Mergúllate no ambiente destas tascas nesta gran festa

O barrio histórico de Moaña, ao contrario do que ocorre na maioría das vilas e cidades, está fóra do centro urbano. O centro sitúase a beiras do mar, coma en todos os pobos pesqueiros das rías galegas que creceron ao redor da intensa actividade dos portos, pero a orixe deste municipio dinámico da comarca do Morrazo áchase na parte alta, concretamente na parroquia de San Martiño.

Alí atopamos unha fermosa igrexa románica do século xii e un barrio, o do Cruceiro, no que se mesturan casas centenarias con outras edificadas nas últimas décadas. Ese é o escenario da gran festa na que os furanchos son o punto de encontro de milleiros de persoas.

Os baixos das antigas casas do barrio convértense por uns días en tabernas nas que compartir unha cunca de branco ou tinto e degustar castañas, empanada ou tortilla coas amigas e amigos

Cada 11 de novembro, as e os moañeses soben á Festa de San Martiño, onde acoden tamén centos de persoas chegadas doutros puntos do Morrazo e do resto de Galicia. Os baixos das antigas vivendas convértense en furanchos, cheos ata a bandeira e cun ambiente bulicioso, nos que grupos de amigas e amigos comparten cuncas de viño caseiro acompañadas de produtos típicos galegos.

Gaitas, pandeiretas, bombos e pandeiros soan nas tascas, onde as e os músicos improvisan muiñeiras —o baile tradicional galego— e outras pezas musicais.

A Festa de San Martiño arrinca o 9 de novembro e esténdese, case sen descanso, desde a mañá ata altas horas da madrugada durante as catro xornadas seguintes. Xunto aos furanchos móntanse na contorna da igrexa grandes carpas con mostradores para servir tamén viño, empanada, tortilla e distintos pratos con carne de porco. En conxunto, o público pode visitar ata vinte tabernas entre vivendas e instalacións ao aire libre. O barrio do Cruceiro convértese nun recinto festivo enorme e multitudinario.

A procesión do día 11, festividade de San Martiño, representa o punto álxido da festa. A imaxe do santo é portada desde o templo xunto coa figura da Virxe do Carme, a única de España elaborada cun tronco de carballo dunha soa peza. Centos de persoas abarrotan os laterais da rúa ata o cruceiro que lle dá nome ao barrio e, desde alí, a comitiva volve á igrexa parroquial.

Grupos de música tradicional, bandas e charangas animan o ambiente, e a programación inclúe xogos e outras actividades lúdicas. A verbena nocturna, coa actuación de grandes orquestras de Galicia, atrae tamén milleiros de persoas a esta festa na que se lles rende devoción a san Martiño e ao viño elaborado en casa.

E para completar o día…

Moaña ofrece numerosos lugares de interese para completar a xornada durante as festas de san Martiño, ademais dunha ampla oferta de locais de hostalería de calidade.

Para unha primeira impresión de toda a contorna, un dos mellores lugares é o miradoiro da Fraga. Desde alí, gozaredes dunha marabillosa panorámica do municipio e da ría, salpicada de bateas, coa cidade de Vigo enfronte. No centro urbano, aconsellámosvos dar un paseo tranquilo pola zona marítima (a Alameda de Moaña) e gozar de esculturas monumentais como a do Fisgón. Ademais, se ides con nenos, este espazo dispón dun parque infantil moi ben equipado. Desde alí, podedes camiñar sempre á beira do mar ata a praia do Con, de bandeira azul.

O areal de maiores dimensións de Moaña é A Xunqueira, cun sistema dunar recuperado, un paseo de madeira e unha ampla zona axardinada con árbores de gran porte. Se seguides camiñando desde alí en dirección oposta ao centro urbano, chegaredes a Samertolameu, tamén cun estupendo parque no que pasar un momento de lecer.