As Rías
Paraíso e despensa
A costa da provincia de Pontevedra conta con tres espectaculares rías salpicadas de acantilados, illas, portos, montes, praias e paisaxes de ilusión que a converten nun lugar perfecto para todo tipo de visitantes.
As rías de Vigo, Pontevedra e Arousa son unha contorna idílico para o descanso, con máis de medio centenar de praias con bandeira azul, e tamén a despensa mariña da provincia. A frota pesqueira e as e os mariscadores extraen das súas augas os mellores peixes, moluscos e crustáceos do mundo, manxares de excelencia listos para degustar en tan só unhas horas nos restaurantes das Rías Baixas.
Desde navegantes transeúntes ata visitas esporádicas do interior, As Rías Baixas son xenerosas e ofrécenlles unha experiencia inesquecible a aquelas persoas que as visitan.
Vista aérea das Illas Cíes
A ría de Arousa é a máis extensa das tres e caracterízase pola presenza de numerosos illotes e arrecifes que actúan como diques naturais. Nela destaca a zona situada no espazo protexido da península do Grove, na enseada que se integra no Complexo Intermareal Umia-O Grove, lugar ideal para as e os afeccionados á observación de aves.
Esta ría é propicia para o fondeo de embarcacións e tamén un lugar ideal para a navegación recreativa, xa que permite practicar todo tipo de actividades náuticas. As praias con bandeira azul salpican o seu litoral e, nas súas augas, máis de 2 300 bateas —dous terzos das que hai nas Rías Baixas— producen o apreciado mexillón.
Cortegada, en fronte de Vilagarcía de Arousa, forma parte do parque nacional das Illas Atlánticas e conta cun bosque de loureiros excepcional. A illa de Arousa é unha contorna paradisíaca cun parque natural fermoso e salvaxe (O Carreirón) e praias idílicas.
Batalla en Vilanova de Arousa
A ría de Pontevedra posúe o trazado máis regular das tres. O río Lérez, que baña a capital da provincia, é o curso fluvial máis importante que verte no seu seo.
Na ría hai varias illas, entre as que destacan a de Tambo e a de Ons. Esta última forma parte do parque nacional das Illas Atlánticas e é un excepcional enclave natural, con fermosas praias e acantilados. A ría baña a costa sur da comarca do Salnés e a norte do Morrazo, franxas de litoral salpicadas con numerosas praias con bandeira azul.
Esta ría destaca pola súa riqueza biolóxica e pola súa altísima produtividade debida á súa abundancia en nutrientes, á boa iluminación e ao movemento das súas augas.
A ría de Vigo, que debe o seu nome á maior cidade de Galicia, situada na súa beira sur e cun dos portos pesqueiros máis importantes do mundo, esténdese a modo de lanza mariña, e estréitase a medida que avanza cara ao interior.
A partir da ponte de Rande, desde onde se pode contemplar como flotan aliñadas as tradicionais bateas, a ría volve abrirse formando a enseada de San Simón. No estreito de Rande tivo lugar en 1702 una das grandes batallas navais da historia, na que a armada anglo-holandesa derrotou á frota hispano-francesa. O afundimento dos galeóns deulle lugar a historias sobre formidables tesouros, unha lenda que recolleu Jules Verne en Vinte mil leguas baixo dos mares.
Na boca da ría, a modo de nave pétrea varada no océano, atópanse as famosas illas Cíes, unha das paisaxes máis fermosas de Galicia e buque insignia do parque nacional das Illas Atlánticas.
