A historia de Fontao é apaixonante. A etapa inicial, na que se realizaba o traballo de forma rudimentaria, foi seguida pola incorporación dos coñecementos mineiros importados polos propietarios ingleses e franceses da mina. Así se forxou unha industria destacada capaz de aproveitar a cotización dos metais en Europa durante esa época.

Recuperar a historia

O Museo da Minería de Fontao ten como obxectivo difundir o legado cultural relacionado directa ou indirectamente coa mina de Fontao mediante a recuperación de documentos, planos, publicacións, fotografías e testemuños de todo o material relacionado con esta temática e velar pola conservación, recuperación e posta en valor do patrimonio industrial e mineiro de Fontao. Pódese visitar a colección aberta ao público nas instalacións de servizos comúns como o antigo cinema, a capela e as escolas, así como os espazos exteriores.

Arredor da mina de Vila de Cruces déronse cita importantes persoas empresarias, enxeñeiras, aventureiras, espías fuxitivas e presas republicanas. A Fontao chegaban presos políticos obrigados a realizar traballos durante a ditadura. Tal era o nivel de actividade que en 1956 os donos construíron todo un poboado mineiro ao redor das galerías. Incluía vivendas, un campo de fútbol, unha escola, un cinema e unha igrexa. Apenas cinco anos despois iniciábase o cesamento dos traballos e, en 1974, pecharía definitivamente.

Forxou unha industria destacada capaz de aproveitar a cotización dos metais en Europa durante esa época

Durante case o século que durou a actividade extractiva na zona modificouse a paisaxe e creouse un importante patrimonio industrial e mineiro do que se conservan elementos representativos que hoxe axudan a entender como foron os anos de esplendor da mina e a organización de persoas traballadoras e da veciñanza.

Aproveita a visita para coñecer o mosteiro de Camanzo, o Hotel Balneario Baños da Brea ou a casa-museo Fundación A Solaina de Piloño e degustar o famosísimo galo de curral de Vila de Cruces.