Serra do Candán: o segredo mellor gardado

Descobre fermosos bosques autóctonos, praderías, unha rica fauna e antigas aldeas nesta cadea montañosa do interior da provincia de Pontevedra

Queres ascender a mil metros de altitude e sentir como o aire te eleva? Telo ao teu alcance na serra do Candán, entre Lalín, Silleda e Forcarei; unha das cadeas de montañas máis extensas da provincia de Pontevedra que goza dunha forte singularidade. Aquí nacen os ríos Lérez e Umia, e varios afluentes do Deza.

O eco das antigas aldeas

Baixar a pé ata o pobo de Grobas é toda unha experiencia en pleno monte virxe e libre que ninguén debería deixar de probar. Alí poderás escoitar o canto dos paxaros ou o son dun arroio, cheirar o aroma refrescante a terra mollada despois de chover, observar os tons verdes das plantas, gozar dun valioso patrimonio arquitectónico e evocar a vida na Galicia de outrora a través das pedras das antigas vivendas. Unha aventura en contacto coa natureza pura.

O seu cume está dominado por matogueiras e grandes rocas e, aos seus pés, gozarás de extensas carballeiras, praderías e dunha importante mostra de arquitectura popular. Ponte en marcha!

O alto de San Bieito ofrécenos unha panorámica sorprendente do val do Deza

Pola serra do Candán discorre unha ruta de sendeirismo de carácter circular, de dificultade media e cun percorrido de preto de 12 quilómetros. O traxecto destaca pola súa variada flora, con bidueiros, carballos ou rebolos; e pola súa fauna, xa que che brinda a posibilidade de divisar algún bufo real ou falcóns peregrinos, difíciles de localizar noutros puntos das Rías Baixas.

Este itinerario sorprendente arrinca na aldea de Bustelos. Un camiño empedrado convídanos a camiñar dous quilómetros ata a aldea abandonada de Grobas, un lugar enigmático onde contemplar o bosque de ribeira que a protexe.

Aquí comeza a ascensión ata o alto de San Bieito, que nos ofrece unha impactante panorámica do val do Deza, aínda máis ao tinguirse das cores do outono. Camiñar polo bordo da montaña farache vibrar de emoción para, a continuación, descender cara a Ameixedo pisando as follas caídas dun bosque de castiñeiros e carballos.

Seguimos o camiño entre prados e zonas húmidas ata chegar a Porto Marín e divisar a ponte de madeira do río Deza. Neste punto dáse media volta cara ao bosque para atravesar por unha ponte de pedra o Rego das Grove, preto da aldea de Grobas.