Ponte Arnelas ou Ponte dos padriños

A ponte tamén coñecida como "Ponte dos padriños" foi construída no século XVI baixo o reinado de Felipe II para unir os municipios de Ribadumia e Vilanova de Arousa. O seu nome débese á lenda relacionada con Ritos de Fertilidade. Segundo conta a lenda, unha muller en estado de xestación con posibles riscos de aborto ou dificultades para xestar, debe achegarse á ponte dos padriños acompañada dunha comitiva, que evitará que a ponte sexa cruzada por unha muller ou animal, e esperarán a que cruce un home, ao que deben pedir que bautice ou bendiga o ventre con auga do río Umia. 

A continuación a muller e a comitiva que a acompaña deben ofrecerlle e compartir co home unha cea alí mesmo, e ao rematar deben lanzar desde a ponte e por encima das súas cabezas a vaixela utilizada para a cea. Se o embarazo chega a bo termo, ese home deberá ser o padriño do neno ou nena que naza e levaría o nome de Alberto ou Alberta en honra ao Santo que se atopa no cruceiro situado na ponte.