Museo etnográfico Liste - Fundación Liste

Nace co principal obxectivo de conservar e expoñer a colección de Olimpio Liste Regueiro. Trátase dun museo etnográfico que busca dar a coñecer e difundir o patrimonio galego nos seus aspectos materiais e espirituais. Instalado nunha vivenda unifamiliar remodelada de mediados do século xx, distribúese en catro plantas e once salas que reflicten aspectos significativos da identidade de Galicia. Nove salas de exposición permanente exhiben máis de 2.000 pezas, a través das cales as e os visitantes percorren os oficios artesanais galegos, a cultura do cultivo do centeo, a roda tradicional, os peches, os tecidos, a madeira escavada, a luz, a materialidade da fe e a arte de sandar. No museo organízanse, ademais de visitas, diversas actividades didácticas, exposicións temporais, audicións musicais. A vivenda está rodeada por unha leira de 5.000 m² que constitúe un espazo de interese, xa que posúe importantes especies arbóreas, unha zona de xardín e construcións de gran valor etnográfico, coma un hórreo, unha fonte e un lavadoiro.