Museo de la minería de Fontao

O obxectivo do Museo da Minería de Fontao é a difusión do legado cultural relacionado directa ou indirectamente coa mina de Fontao mediante a recuperación de documentos, planos, publicacións, fotografías e testemuños de todo o material relacionado con esta temática e velando pola conservación, recuperación e posta en valor do patrimonio industrial e mineiro das minas de Fontao. A importancia da actividade extractiva de Fontao representou durante anos un forte impulso á economía nacional, sendo o wolframio o produto estrela das exportacións españolas. Pero máis aló do que a febre do ouro negro supuxo durante as diversas contendas bélicas, a historia da mina de Fontao fala dunha industria punteira que soubo aproveitar a cotización dos metais que se extraeron nesta mina. En Fontao déronse cita grandes empresarios, técnicos competentes, traficantes, aventureiros, espías fugitivos e presos republicanos. Xerouse por tanto, nos case 100 anos de actividade extractiva, un patrimonio industrial e mineiro que se une ao xeolóxico e inmaterial e ao dunhas instalacións que contén todos os elementos representativos dunha explotación mineira. A colección visitable do Museo da Minería de Fontao podemos atopala nas instalacións de servizos comúns do Poboado mineiro de Fontao: o antigo cinema, capela e escolas, xunto cos espazos exteriores