Marco - Museo de arte contemporáneo

Atópase nun edificio de estilo ecléctico do arquitecto José M.ª Ortiz, que se deseñou en 1861 para albergar o antigo palacio de xustiza e cárcere. Este novo centro de arte, creado para difundir propostas culturais contemporáneas, basea a súa identidade no dinamismo da súa programación e no seu espírito participativo. As actividades principais, ao redor das que se articula a programación museística, son as exposicións temporais, dedicadas á produción artística recente nos seus máis variados campos creativos: artes plásticas, arquitectura, vídeo, deseño ou cinema. Estas enmárcanse en tres liñas de programación prioritarias: mostras pluridisciplinares sobre arte e cultura no ámbito nacional e internacional; investigacións e revisións históricas que fomenten a recuperación de autores ou movementos artísticos galegos unidos a linguaxes vangardistas; e, por último, a sala de exposicións do edificio anexo, dedicada á produción de proxectos de artistas emerxentes de Galicia. O MARCO constitúe a proposta máis vangardista da cidade e ofrece programas didácticos, dirixidos a escolares, familias, nenas e nenos, e formativos, para artistas e docentes.