Desde a primavera ata o outono, sempre elixirás un bo momento para aprender ou mellorar en remo con algunha das moitas empresas especializadas que operan na provincia de Pontevedra e que poñen á túa disposición monitoras e monitores con experiencia capaces de guiarte cara a un illote espectacular, descoñecido e pouco transitado fóra da tempada alta.

Trátase dun dos lugares máis especiais da provincia e poderás vivilo na súa máxima expresión.

Esta tranquilidade fará que sexa unha travesía especial e imprescindible na túa viaxe á provincia de Pontevedra.

Estas pequenas embarcacións son un transporte perfecto para descubrir a ría de Arousa dunha forma diferente, deixándote levar pola natureza e gozando da paz e da calma que ofrece o mar neste punto a aquelas persoas que nos visitan. Se tes sorte, ademais, poderías recibir a visita dos pequenos arroaces que cruzan as nosas rías.

Para chegar a este espazo protexido existen varias alternativas. Dispós de diversas rutas en kaiak para coñecer os distintos puntos de interese na contorna da Illa de Arousa, como o parque natural do Carreirón, as calas menos coñecidas e as zonas de marisqueo. Poderás realizar a ruta ao teu ritmo, sen ruído nin molestias, e achegarache sensacións que non se poden explicar. Visitar Areoso, un dos lugares máis especiais da provincia de Pontevedra, é vivir As Rías Baixas na súa máxima expresión.

Xacemento arqueolóxico

Máis aló da súa beleza e das impresionantes vistas que ofrece sobre os pobos costeiros de Arousa e as bateas, Areoso é unha potencia a nivel arqueolóxico. As escavacións realizadas sacaron á luz un dos xacementos máis importantes de Galicia. A illa deixou ao descuberto un total de cinco monumentos megalíticos e cinco estruturas de caixas realizadas con pedra. Hai indicios de ocupación durante a Idade de Bronce e o Neolítico.