Nos montes da provincia crece unha gran diversidade de cogomelos e pódense atopar variedades comestibles case en calquera lugar. Con todo, existen zonas de colleita clásicas, que pasaron a formar parte dos lugares imprescindibles para as e os buscadores de fungos debido á súa alta produción e accesibilidade.

Entre os montes máis visitados temos, por exemplo, O Vixiador, en Candeán, e os montes dos arredores da Universidade de Vigo; a contorna do lago Castiñeiras, no Morrazo; o monte Castrove, entre Meis e Poio; os piñeirais costeiros da comarca do Salnés (Sanxenxo, O Grove e A Illa de Arousa); e, no interior da provincia, as ribeiras do Ulla e as carballeiras e os soutos de Lalín, Silleda e Forcarei.

En realidade, na provincia de Pontevedra trátase dun pasatempo relativamente recente cuxa tradición non vai máis aló dos anos setenta. As fillas e fillos daquelas primeiras colleiteiras e colleiteiros constitúen agora a segunda xeración de buscadores de cogomelos e son eles os que fixeron un esforzo por divulgar os praceres da micoloxía entre o gran público.

As especies de cogomelos máis recollidas na provincia son os boletos, as cantarelas, a lingua de gato, o níscaro e o choupín.

Colle a túa cesta e intérnate neste fascinante mundo. E, xa de paso, goza da riqueza da flora e fauna que nos brinda As Rías Baixas neste tempo de outono.

¿Onde buscar consello?

Saber identificar os cogomelos comestibles é fundamental se queremos evitar as tan temidas intoxicacións. Por iso numerosas asociacións organizan nestes meses xornadas micolóxicas nas que se imparten leccións teóricas e prácticas de colleita e recoñecemento dos cogomelos. Na actualidade existen diversos colectivos dedicados a ensinar e promocionar o mundo dos cogomelos nas principais localidades das Rías Baixas, como é o caso de Brincabois, en Pontevedra; Liboreiro, en Bueu; A Cantarela, en Vilagarcía de Arousa; A Zarrota, en Vigo, e Estrada Micolóxica.

1. Agaricus campestris

Tamén coñecido como champiñón silvestre ou fungo dos lameiros. É un cogomelo de pequeno tamaño e cor branca. Crece tanto na primavera como no outono en prados e xardíns ricos e ben abonados.

2. Boletus do grupo edulis

Neste grupo inclúense catro especies comestibles moi semellantes, Boletus edulis, Boletus aestivalis, Boletus pinophilus e Boletus aereus. Son de cor marrón e adoitan crecer en bosques de frondosas ou coníferas. Tamén reciben o nome de andoas.

3. Cantharellus cibarius e Cantharellus pallens

Trátase de dúas especies moi semellantes. Nas Rías Baixas coñécense polo nome popular de cantarelas e a súa forma parécese á dunha trompeta. A cor depende das características do terreo onde crecen, aínda que adoita variar entre amarelo abrancazado ou o laranxa.

4. Coprinus comatus

Tamén coñecido na provincia como barbuda. Ten un sombreiro alongado moi característico e crece en prados, xardíns e herbais.

5. Craterellus tubaeformis

Nas Rias Baixas denomínase angula de monte, xa que, ao cociñalo, o pé do cogomelo lembra este peixe. Frutifica en bosques caducifolios, piñeirais e eucaliptais, ben entrado o outono, cando baixan as temperaturas.

6. Repandum hyndnum

Tamén coñecido como lingua de ovella ou lingua de vaca, é un cogomelo tardío que, do mesmo xeito que o anterior, sae ben avanzado o outono, a partir de novembro. É de cor crema e podémolo atopar en bosques de frondosas, coníferas e eucaliptais.

7. Lactarius deliciosus

Chamado níscaro e, nalgunhas zonas de Galicia, fungo da muña. É un cogomelo moi apreciado en gastronomía e, de feito, moitas colleiteiras e colleiteiros só se centran nesta especie. Frutifica en piñeirais e posúe unha cor e un látex alaranxado moi característico.

8. Macrolepiota procera

Tamén coñecido como chouparro, roco ou choupín. Distínguese por ser alto e esvelto, e o seu sombreiro pode alcanzar 40 centímetros de diámetro. Crece en bosques iluminados, prados e chans ben abonados.

9. Neoboletus erythropus

Antes era coñecido como Boletus erythropus. É un cogomelo de tipo boleto, con sombreiro marrón, poros vermellos e carne amarela que se volve azulada cando entra en contacto co aire. O seu hábitat son os bosques de frondosas e coníferas.

10. Trincholoma portentosum

Coñecido como tortullo, é un cogomelo de sombreiro gris e pé abrancazado con tonalidades de amarelo pálido. Crece en piñeirais cando chega o frío, a partir do mes de novembro.